सिंदेवाही वनपरिक्षेत्रा अंतर्गत नाचनभट्टी बिटातील उमरवाही परिसरात शेळ्या राखणाऱ्या गुराख्यावर अचानक वाघाने हल्ला करून जखमी केल्याची घटना शनिवारी सायंकाळच्या सुमारास घडली. उटी (माल) येथील गुराखी दादाजी गंगाराम नन्नावरे (६५) व हंसराज कन्नाके (30) हे नेहमीप्रमाणे शेळ्या चारण्यासाठी उमरवाही येथील जंगल परिसररात शेळ्यांना पाणी पाजण्यासाठी उमा नदीत उतरले व परत घाटावर चढत असताना झुडपांचा फायदा घेऊन वाघाने दादाजीवर हल्ला केला. यामुळे हंसराज घाबरला. कसेबसे स्वत:ला सावरत शेतातील लोकांना त्यांनी आवाज दिला.
लोकांच्या आवाजाने वाघ पळाला व दादाजीचा जीव वाचला. परंतु यामध्ये दादाजीला गंभीर दुखापत झाली. सिंदेवाही ग्रामीण रुग्णालयात प्रथमोपचार करून चंद्रपूर रुग्णालयात हलविण्यात आले. त्वरित वाघाचा बंदोबस्त करण्याची मागणी नागरिक कडून केली जात आहे.
Tags:
Chandrapur