स्वत:सह दुसऱ्याला मालामाल करायला गेला; ७ लाख रुपयांची लाच घेताना अधिकारी फसला; ACBने रंगेहात पकडलं

धुळे : इरकॉन सोमा टोलवे प्रा.लि. कंपनी दिल्ली यांनी त्यांच्या हद्दीतील महामार्ग क्रमांक ३ मुंबई-आग्रा महामार्गावरील चांदवड टोल नाका याच्या देखभाल दुरुस्तीचा करार केला आहे. या टोलनाक्याची जानेवारी २०२३ पर्यंतची थकीत रक्कम आणि धुळे जिल्ह्यातील लळिंग टोलनाका व्यवस्थापनाचा ठेका मिळवून देण्यासाठी तक्रारदाराकडे स्वता:साठी २ लाख आणि इरकॉन सोमा टोलवे कंपनीच्या संचालकासाठी ५ लाख असे तब्बल ७ लाख रुपये लाचेची मागणी करुन लाचेची रक्कम स्विकारताना टोलवे कंपनीच्या अकाऊंन्टींग व फायनान्स अधिकाऱ्याला धुळे लाचलुचपत विभागाच्या पथकाने रंगेहाथ अटक केल्याची घटना घडली असून या घटनेमुळे जिल्ह्यात एकच खळबळ उडाली आहे.

तक्रारदार यांनी कोअर असोसिएटस कंपनीचे चांदवड टोल प्लाझाच्या व्यवस्थापनाबद्दलचे डिसेंबर २०२२ ते जानेवारी २०२३ चे रिअँम्बर्समेंन्ट रक्कम अदा करण्यासाठी तसेच कोरल असोसिएटसने धुळे लळींग टोल प्लाझा व्यवस्थापनाचा ठेका मिळण्यासाठी भरलेली निवीदा मंजूर करण्यासाठी तक्रारदार यांच्याकडे १९ फेब्रुवारी रोजी धुळे लळींग इरकॉन सोमा टोलवेचे फायनान्स अधिकारी हरिष सत्यवली यांनी स्वता:साठी २ लाख व इरकॉन सोमा टोल व प्रा.ली. नवी दिल्ली चे संचालक प्रदीप कटियार यांच्यासाठी ५ लाख अशी एकूण ७ लाख रुपयांची मागणी केली होती.

इरकॉन सोमा टोलवे प्रा.लि. कंपनी अधिकाऱ्यांनी केलेल्या या मागणी नुसार तक्रारदाराने २१ फेब्रुवारी रोजी धुळे येथील लाच लुचपत प्रतिबंधक विभागाकडे तक्रार केली. त्यानंतर काल लाचेची रक्कम घेऊन लाच लुचपत प्रतिबंधक विभागाच्या अधिकाऱ्याच्या सक्षम ती लाच देत असताना लाच लुचपत प्रतिबंधक विभागाच्या अधिकाऱ्यांनी संबंधित टोल अधिकाऱ्याला रंगेहात ताब्यात घेतलं आहे.

दिल्ली येथील कंपनीच्या संचालक प्रदीप कटियार व धुळे टोलवे चे फायनान्स अधिकारी हरिष सत्यवली या दोघांवर लाच लुचपत प्रतिबंधक कायद्यानुसार गुन्हा दाखल करण्यात आला आहे. दिल्ली येथील कंपनीच्या संचालक प्रदीप कटारिया यांना ताब्यात घेण्यासाठी एसीबीचे पथक दिल्ली येथे रवाना केले असल्याची माहिती लाच लुचपत प्रतिबंधक विभागाचे पोलीस उपनिरीक्षक अनिल बडगुजर यांनी दिली.