सिरोंचा तालुक्यातील चिटूर गावात तहसील प्रशासनाच्या वतीने बुधवारी महाराजस्व अभियानाचे आयोजन करण्यात आले होते. या कार्यक्रमात सहभागी होण्यासाठी लक्ष्मीदेवीपेठा येथील नागरिक गेले होते. कार्यक्रम आटोपून सायंकाळी 4 वाजताच्या सुमारास गावकरी ट्रॅक्टरवर बसून आपल्या गावाकडे परत जात होते. दरम्यान, रंगधामपेठा गावाजवळ ट्रॅक्टर चालकाचे नियंत्रण सुटल्याने ट्रॅक्टर ट्रॉली पलटी झाली. यात दोन महिलांचा जागीच मृत्यू झाला. तर 27 जण जखमी झाले. यापैकी चिन्ना मलय्या लचुमेरा लंबाडी यांच्यासह एकूण 12 जण गंभीर जखमी होते. त्यांना तेलंगाणा राज्यातील मंचेरियाल येथे उपचारासाठी भरती करण्यात आले होते. मात्र आज सकाळच्या सुमारास लंबाडी यांचा मृत्यू झाल्याची माहिती आहे. तर उर्वरित जखमींवर मंचेरियाल आणि सिरोंचा येथील ग्रामीण रुग्णालयात उपचार सुरु आहेत.