एका पत्नीनं तिच्या पतीचा विवाह त्याच्या जुन्या प्रेयसीशी करून दिला. लग्नाच्या साऱ्या विधींना पत्नी उपस्थित होती. इतकंच नव्हे, तर आता तिघेही एकाच घरात राहणार आहेत. तिरुपतीमधील डक्कली येथील आंबेडकर नगरात वास्तव्यास असलेला कल्याण यूट्यूब, शेअरचॅट आणि अन्य व्हिडीओ प्लॅटफॉर्म्ससाठी व्हिडीओज तयार करतो. सोशल मीडियावर तो बराच प्रसिद्ध आहे.
सोशल मीडियाच्या माध्यमातून कल्याणची ओळख कडापा येथे राहणाऱ्या विमलाशी झाली. मैत्रीचं रुपांतर कालांतरानं प्रेमात झालं. कुटुंबीयांच्या सहमतीनं दोघांनी विवाह केला. विमला आणि कल्याण एकत्रित व्हिडीओ करू लागले. दोघांचा सुखाचा संसार सुरू असताना कल्याणची एक्स गर्लफ्रेंड नित्याश्रीची एंट्री झाली. नित्याश्री थेट कल्याणच्या घरी पोहोचली. कल्याण विवाहित असल्याचं नित्याश्रीला समजलं. मात्र तरीही ती त्याच वस्तीत राहू लागली. स्वत:ला कल्याणची पत्नी मानू लागली.
नित्याश्री आणि कल्याणच्या नात्याबद्दल विमलाला समजलं. तिनं दोघांचं लग्न लावलं. लग्न सोहळ्याला विमला उपस्थित होती. त्या तिघांचा फोटो सोशल मीडियावर व्हायरल झाला आहे. तिघांनी एकाच घरात राहण्याचा निर्णय घेतला आहे. त्यामुळे या अनोख्या लग्नाची सध्या सोशल मीडियावर जोरदार चर्चा आहे.
